काठमाडौँ । जेष्ठ नागरिक,अपाङ्गता भएका र एकल महिलाका लागि मात्र सामाजिक सुरक्षा भत्ता दिदै आएको सरकारले अब बालबालिकाका लागि समेत यस्तो व्यवस्था गर्दैछ ।

सरकारले गरिबीको रेखामुनि रहेका रौतहट, बझाङ र अछाम जिल्लाका बालबालिकालाई सामाजिक सुरक्षा भत्ता दिने भएको हो ।

सङ्घीय मामिला तथा स्थानीय विकास मन्त्रालयले केही दिनअघि मात्र ती जिल्लामा बसोबास गर्ने पाँच वर्षमुनिका बालबालिकालाई सामाजिक सुरक्षा भत्ता दिने निर्णय गरेको हो ।

केन्द्रीय पञ्जीकरण विभागका सूचना अधिकारी खिलप्रसाद सुवेदीले आम्दानी नभएका परिवारका बालबालिकालाई पोषणका लागि मासिक छ सय दिन लागिएको जानकारी दिए । उनले भने, ‘पहिला तीन जिल्लालाई पोषण भत्तास्वरुप रकम दिन्छौँ, कति आवश्यक पर्छ हेरेर अरु जिल्लामा पनि क्रमशः विस्तार गर्दै लैजान्छौँ ।’ यसअघि विभागले दलित र कर्णाली अञ्चलका पाँच वर्षमुनिका बालबालिकालाई सामाजिक सुरक्षा भत्ता दिँदै आएको थियो ।

स्थानीय विकास मन्त्रालय, केन्द्रीय पञ्जीकरण विभागले सुरुमा तीन जिल्लाका बालबालिकालाई सामाजिक सुरक्षा दिनका लागि २० करोड रकम विनियोजन गरेको छ । आव २०७३र०७४ का लागि सामाजिक सुरक्षा भत्ताबापत सरकारले ३२ अर्ब ६९ करोड ९९ लाख ९९ हजार छुट्याएको छ ।

Comments

comments